Sa Gapo kan Nakaagi

Sa paghuyop huyop kan duros

Nagbabayle na naman an mga gugon.

Napundo sa pagawit

an mga gamgam sa kahiwasan

mantang pauli sa saindang eerokan

An oras pano nin katiwasayan

Mantang mga tawo nawawara sa dalan.

An dating nakangirit na saldang

luway luway na minatago

Sa lindong kan alapaap.

Tagiti nagdampi sa saiyang pisngi.

Nagdadali dali pasiring sa

papadumanan,

sa lugar kun sain sinda

nagkamidbidan

dai mati an tipsik na nagdadalahay

poon sa angog pasiring sa ngabil.

Hasta makaabot sa papadumanan

mayong tinatago sa uran.

Nagturo an ganot

Kaiba an nilaag na pahamot.

Tuminukaw sa gapo kan nakaagi

nagbalik tanaw arog kan dati.

Dai na maibabalik an dating kaogmahan

pinatos na nin kamunduan

kinua na kan kawaran

asin dai na mapasaimo minsan.