Eleksyon.

Kan nagdadangadang an bulan nin Abril.

Manlaenlaen na lalawgon sa poste asin paril

“ honesto, kagalang galang asin marhay an pagkatawo

Masain pa kamo, saindong iboto sa maabot na Mayo.”

Sari saring pakwela tinatao sa masa

Seminar sa palitada asin baylihan sa plasa

Dai pa nakontento docientos kada boto

“ pagabot kan mayo isurat mo lang ako sa balota mo.”

Pambihirang mga tataramon saimong madadangog

Solusyon sa mga problema saimong mahihinanyog

Kaya mga tawo nariribungan

Kun sain nanggad maduman.

Praktikal na tawo dangal saindang pinabakal

Dignidad, futuro kan katawohan kinalakal

Sa mga politikong madadaldal

Kaya ngunyan nasyon siging iriwal.

Haen an magagayon na pangako

Garo sa duros ipinako

Kasaraditan iyo an nagsasapo

Haralangkaw na tawo nagyayaraman lalo.

Kun ika saro duman sa mga praktikal

Na nagpabakal kan saimong dangal

Makonsensya ka man lugod sa saimong ginibo

Sa sunod, protektahan, alagaan saimong boto.