Daragang Bikolnon

Ikumpara ka man sa daragang magagayon

Sa luwas o sa laog kan nasyon

Nin huli ta ika daragang Bikolnon.

Perlas kan sirangan an saimong mata

Buhok an hamot orog pa sa sampaguita

Ngabil mala rosas an pula

Saimong tindog siring sa nababanaag na aga.

Pero may mas orog pa kaiyan

Nagdadalahay sa dugo an kabinihan

Tikas sa saimo an karahayan

Poon sa tipsik kan ginikanan.

Hiwas kan kadagatan saimong kadunungan

Daing lihid saimo an kasaysayan

Sa kasakitan pirit na minakamang

Pirit na matindog sa labuyan.

Ugat kan saimong pagkatawo an Kagurangnan

Aldaw bangi hapros sa saimong daghan

Kayamanan ka nin mga kalalakihan

Patugmadan kan mga kasaraditan.

Nasasamnuhan ka nin bulawan

Tinitingkalag ka nin kagabsan

Bukal sa kalangtadan

Orkid sa kabukidan.